TACLOBAN CITY – Patay an usa nga retired US navy mahuman nga pagpamumun-on han duha nga menor de edad nga mga suspek ha sakob han iya ginrerentahan nga panimalay ha Zamora Street, Brgy. 7 Tacloban City.
Ginkilala an biktima nga hi Thomas Mate, 62 anyos an pangidaron ngan residente han mao nga barangay.
Sumala kan Pol. Maj. Allan Camasin, Information Officer han Tacloban City Police Office (TCPO), subay ha inisyal nga imbestigasyon, ginpapanginano han biktima an iya ginrerentahan nga establishmento tungod nga nakaabat hiya nga may presensya hin dire niya kilala nga mga tawo ha sulod hini.
Han makatunog naman an mga suspek nga nakada ha sakob han establishmento an tag-iya, dayon ini nira nga ginpanbubuno ha magkadirudilain nga parte han lawas hini.
Nadara pa ha ospital an biktima pero gindeklara ini nga dead on arrival.
Ha pagkayana, naaresto na an mga suspetsado nga nag-eedad 16 ngan 17 anyos.
