Maaatubang ha mabug-at nga sirot ngan pagkakapreso an mga kumpanya han lana nga matalapas ha gintudlok nga limitasyon ha oil price adjustments.
Sumala kan Energy Secretary Sharon Garin, nakaandam an iya ahensya nga mag-isyu hin show-cause orders kontra ha mga kumpanya han lana nga dire magsusunod ha gintudlok han gobyerno nga adjustments.
Bisan ha yana in compliant o nagsusunod an kada kumpanya ha gintudlok nga adjustments, nagpahimatngon an sekretarya ha mga magtatalapas nga pwede hira maatubang ha mga sirot nga makakaupat ha ira permit to operate.
Sumala naman kan DOE Oil Industry Management Bureau director Rino Abad, maaatubang ha tulo kabulan ngada ha usa katuig nga pagkakapreso an mga kumpanya han lana nga magtatalapas ngan multa nga maabot tikang P50,000 ngada ha P300,000.
Ginbuhat han DOE officials an pahayag mahuman matagan hin kapas an gobyerno nga magdikta o limitahan an price adjustments ha butnga han pabag-o bag-o nga presyo han lana ha world market mahitungod han kasamok ha Middle East. Ini in kasunod han pagdedeklara ni Presidente Ferdinand Marcos Jr. hin State of National Energy Emergency ha nasud.
