Iginkadismaya ni Ukrainian President Volodymyr Zelensky an susrunod nga pagbisita han mga envoy han Estados Unidos ha Moscow hin dire manla naaagi ha Kyiv, nga daw “disrespectful” ha butnga han nagpapadayon nga kasamok ha Ukraine.
Ha usa nga pahayag, ginmalatumat ni Zelensky nga bisan man naiintindihan niya an mga logistical challenges, dire maididiwara nga an pagkadto nira Steve Witkoff ngan Jared Kushner ha Russia hin dire ginbibisita an Ukraine in nagpapakita hin kakulangan hin pagrespeto.
“It’s disrespectful to come to Moscow and not Kyiv,” dugang ni Zelensky, samtang gintatagan-duon nga abri an Ukraine ha pakikighampang bisan ha iba nga nasud kun kinahanglan.
Hi Witkoff, nga special envoy ni U.S. President Donald Trump, in pira kabeses na nga nakighampang kan Russian President Vladimir Putin ha Moscow.
Nahibaruan nga bisan san-o in waray pa bumisita an mga opisyal ha Kyiv.
Syahan na nag ginpahayag ni Zelenksy nga mayda plano bumisiya ha Ukraine an duha nga opisyal yana nga Abril pero waray ini madayon mahitungod ha pagbalhin han atensyon han Amerika ha nagpapadayon nga kasamok ha Middle East, partikular an kasamok han US-Israel kontra ha Iran.
Ha kaluyo hini, iginduon ni Zelensky an importansya han padayon nga kooperasyon ha Estados Unidos.
Ha kaluyo nga bahin, nagpapadayon an mga istoryahon ha ceasefire ha Ukraine, nga nag-iha na hin sobra tuig katuig. Bisan man mayda pira nga ginkasabutan kasumpay ha military arrangements, nagpapabilin nga dire na-resolba an importante nga isyu sugad han status han Donbas region ngan iba pa nga kondisyon nga dire makarawat han magkaluyo nga parte.
Ha presente, nagpapabilin nga deadlock an negosasyon, samtang padayon an panawagan han Ukraine para ha mas aktibo nga partisipasyon ngan pagkilala ha ira posisyon ha istoryahon nga pankahimyangan.
