NATIONAL NEWS– Padayon an gindudumara nga imbestigasyon ngan beripikasyon han Philippine National Police (PNP) kasumpay ha posibilidad nga dire la ha Taal Lake posible ginpanlabog ngan iginlubong an mga patay nga lawas han sobra 100 nga nawawara nga sabungero.
Sumala kan PNP Chief PGen. Nicolas Torre III, ginpapailarom pa ha beripikasyon an impormasyon nga may pira nga nagpapahayag nga ginsunog an pira nga mga sabungero samtang an pira naman in iginlubong an mga ine.
Dugang pa hiton hepe, posible nga dire la ha Taal Lake an gingamit nga disposal site para ha mga patay nga lawas han sabungero ngan may pira pa nga partikular nga lugar.
Bumaribad naman an hepe nga igpaangbit an mga lugar nga ira ginbeberipika para masigurado nga dire mabubulilyaso an ira ginhihimo nga imbestigasyon ngan paghikay hiton mga sadang nga ebidensya nga masuporta ha nagin testamento ni alyas ‘Totoy’.
