NATIONAL NEWS– Ginkondinar han anay Bayan Muna Representative nga hi Carlos Isagani Zarate an report nga plano magtindog an Estados Unidos hin ammunition factory ha Subic Bay nga kilala nga anay base-militar han Amerika.
An nasabi nga desisyon in mahuman nga manduhan han US House Committee on Appropriations han nakalabay nga Hunyo 16 an mga ahensya han gobyerno nga panginanuon an posibilidad nga pagtindog han usa nga “joint ammunition manufacturing and storage facility” ha nasabi nga lugar.
Subay ha komiter kulang an ira pasilidad para ha “forward-staged ammunition manufacturing” ha rehiyon han Indo-Pacific.
Ginpahimatngon pa ni Zarate an posibelidad hiton kadelikaduhan han proyekto kumo usa nga “magnet for conflict.”
Dugang pa hine, an pagtugot ha Amerika nga magtindog hin sugad nga pasilidad ha Subic, in usa nga panamas-tamas ha soberanya han Pilipinas ngan posible nga maibutang an nasud ha kadelikaduhan kumo potensyal nga target hiton giyera.
Gin-aghat gihapon han anay kongresista an administrasyon ni Pangulong Ferdinand Marcos Jr., nga depensarang an “independent foreign policy” ngan dire tumugot ha mga karuyag han Estados Unidos nga ikokompromiso han seguridad ngan soberanya han nasud.
