Gin aghat ni Parañaque 2nd District Representative Brian Yamsuan an Kongreso nga padagmiton an pagpasar ha panukala nga Cybersecurity Act agud maproteheran an mga kritikal nga impormasyon ha nasud ngan mapakusog an depensa kontra ha mga hulga ha internet.
Gin pagawas ni Yamsuan an panawagan kasunod han pahimatngon han International Monetary Fund (IMF) kasumpay han nagtitikahitaas nga hulga han cyber attacks ha pankalibutan nga sistema han pananalapi gamit an Artificial Intelligence (AI).
Ginmalatumat gihapon han Kongresista an nahitabo nga date breach ha Canvas, usa nga Learning Management System nga ginagamit han mga unibersidad ha Pilipinas, nga nagbuyagyag han mga pribado nga rekord han mga istudyante.
Sumala kan Yamsuan, an mga cyber attacks in dire la simple nga pangawat hin datos para ha phishing, kundi usa nga dako nga hulga ha nasyunal nga seguridad ngan katalwasan han publiko.
