TACLOBAN CITY – Padayon an ginbubuhat nga monitoring ngan assessment han Office of Civil Defense (OCD) Regional Office ha naeksperyensyahan nga mga pagbabaha ha damo nga parte han Sinirangan Bisayas tungod han waray wantas nga pag-inuran durot han tail-end of a frontal system.
Sumala kan Rey Gozon, Assistant Regional Director han OCD 8, partikular nga mga lugar ha rehiyon nga nagkaada hin hitaas tubig-baha amo an pira nga parte han Palo, Tacloban, Dulag, Quinapondan, Arteche ngan Jipapad, Eastern Samar.
Padayon pa gihapon an assessment ha kabug-usan nga ihap han mga pamilya nga ginpailarom ha evacuation.
Nakastandby naman an DPWH ha pagresponde ingkaso nga magkaada hin landslide o paglaprak han katunaan.
Nahibaruan nga an paglapwas han tubig ha pira nga sapa tungod han duro nga uran an rason han pagbabaha ha pira nga lugar ha rehiyon.
