Gindara han Department of Trade and Industry Region 8 ha Metro Manila an mga produkto han mga micro, small, and medium enterprises o MSMEs tikang ha Sinirangan Bisayas kumo kaparte han pagsalin-urog han 26th Bahandi Eastern Visayas Trade Fair.
Gintikangan an nasabi nga trade fair dida han Oktubre 1 ngan mag-iiha naman kutob Oktubre 5, 2026, ha usa nga mall ha Mandaluyong City kun diin, 94 eksibitors tikang ha Leyte, Southern Leyte, Biliran, Samar, Eastern Samar ngan Northern Samar an naki-usa.
Sumala kan DTI-8 Information Officer, Anthea Aivi Borbon-Ancheta nga panuyuan yana han ira Bahandi Trade Fair nga tagan hin mas dako pa nga market access an local MSMEs, mapakusog an ira mga produkto ngan makakuha hin mga bag-o nga buyer ngan business connections ha Metro Manila.
Dugang pa hini nga target gihapon han DTI-8 nga umabot ha P48 milyon an sales han mga umapi ha nasabi nga trade fair.
Samtang, sumala pa kan Ancheta nga masurong ha mga residente han Manila an mga pagkaon, processed agricultural products, handicradts, fashion items, ngan iba pa nga produkto nga himo ha Sinirangan Bisayas kun diin, nakikita niya nga posible malahusan pa hini an ira target sales yana nga tuig.
