Panuyo han Heaven’s Gateway Chapel nga makaghatag hin barato ngan desente nga funeral service para ha katawhan.
Sumala kan Alvin Abejuela, tag-iya han Heaven’s Gateway Chapel, nga nahuna-hunaan niya nga magtukod hini nga negosyo kahuman niya mahibaruan, labi na ha Samar, an duro nga kahitaas nga presyo han mga serbisyo ha punerarya. Tungod hini, nakita niya an panginahanglan nga magkamay-ada hin pareho nga negosyo nga makakaghatag hin desente nga serbisyo nga diri mabug-at ha bursa han mga pamilya nga namatayan.
Para kan Abejuela, diri la ini negosyo nga naghahatag hin panginabuhi, kundi usa liwat nga paagi agud makabulig ha sosyedad pinaagi ha pagsolbar han problema nga naieksperyensyahan han mga pamilya labi na kun namamatayan hira hin hinigugma ha kinabuhi.
Ginpahayag liwat ni Abejuela nga kaparte han ira trabaho an paglimpyo ngan pag-sanitize han patay nga lawas agud maproteheran an ira mga empleyado ngan an pamilya han namatay tikang ha posible nga mga sakit. Para ha iya, diri angay kahadlukan an sugad nga trabaho kay normal na ini nga kaparte han ira adlaw-adlaw nga serbisyo, ngan ira ginsusunod an igo nga proseso.
May kalabotan naman ha proseso han embalming, ginpaangbit ni Abejuela nga nagbag-o na yana an pamaagi hini, kun diin pinaagi hin suction ngan pag-inject han medisina ha carotid veins, ginkukuha an mga ngatanan nga fluids han patay nga lawas. Samtang, diri na kinahanglan tanggalon an mga internal organs, ngan pinaagi han bag-o nga proseso, nagpapabilin nga maupay an kondisyon han patay nga lawas ha sulod hin 10 tubtob 15 ka adlaw.
