TACLOBAN CITY — Nagdeploy an Philippine Coast Guard (PCG) hin 565 nga personnel ha bug-os nga Eastern Visayas agud siguraduhon an seguridad ngan katalwasan han mga pasahero nga mabibiyahe ha mga pantalan ngan kadagatan yana nga panahon han Undas.
Sumala kan LTJG Mart Andrew C. Mangolare, Station Commander han Coast Guard Western Leyte ngan Public Information Officer han Coast Guard District Eastern Visayas, gindeploy an mga personnel ha 10 nga Coast Guard stations ha rehiyon. May-ada liwat hira 16 nga floating assets nga nakapwesto ha magkadurudilain nga lugar ngan andam magresponde ha bisan ano nga emergency. Tikang dida han Oktubre 29 tubtob Nobyembre 3, nakapailarum na ha heightened alert status an bug-os nga kadagatan han Eastern Visayas.
Ha datos han PCG, nakapagtala na hira hin 27,392 nga inbound passengers ngan 24,000 nga outbound passengers ha bug-os nga rehiyon. May-ada liwat 3,795 nga inbound rolling cargo ngan 3,523 nga outbound rolling cargo ha ngatanan nga dagko nga pantalan ha Eastern Visayas. Ginlalauman pa nga mas madamo an magigin pasahero, labi na ha mga pantalan han Tacloban, Ormoc ngan Maasin.
Dugang pa ni Mangolare, nagtalaga liwat an PCG hin mga duty lifeguard ha mga isla nga posible damu an bumisita, pareho han Kalanggaman Island ha Palompon, Digyo Island ngan iba pa nga mga isla. Gin-aaghat liwat ni Mangolare an mga pasahero nga diri magdara hin mga igindidiri nga mga gamit pareho han kutsilyo ngan iba pa nga matarom nga mga kagamitan.
Nagpahimatngon liwat hi Mangolare ha mga mabibiyahe nga kumadto hin temprano ha mga port terminals ngan magdara hin dokumento mahitungod nga magkamay-ada hin inspeksyon an PCG.
