Magpapabilin ha P20 kada kilo an presyo han humay samtang padayon an pag-ani han mga parag-uma ha rehiyon.
Sumala kan Frederick Dy, Presidente han Grains Retailers Confederation-Eastern Visayas, damu an suplay han humay ha pagkayana mahitungod nga harvest season, ngan mas madagmit liwat an pag-ani han mga parag-uma mahitungod han gintatawag nga mechanized harvesting.
Samtang, ginpahayag ni Dy nga waray pa magbag-o an presyo han humay pero posible nga sumaka ini hin gutiay kun tikahuman na an panahon han pag-ani.
Samtang, nagpapabilin liwat nga stable an presyo han bugas bisan pa han paghitaas han presyo han petrolyo ngan delivery charges. Sumala kan Dy, nakakabulig ha pag-stable han presyo an padayon nga pagsulod han imported rice ha merkado.
Ha pagkayana, mas hitaas pa an presyo han lokal nga bugas nga aada ha P48 tubtob P50 kada kilo, samtang aada gihapon ha haros pareho nga price range an imported nga bugas. Para kan Dy, an presensya han imported rice an usa han mga rason kun kay-ano diri nagbabag-o an presyo han bugas ha merkado.
