Padayon nga ginbabantayan han Office of Civil Defense (OCD) Region 8 an epekto han El Niño ha Eastern Visayas, samtang may mga lugar na ha rehiyon nga nakakaeksperyensya han epekto hini ha agrikultura.
Sumala kan Sher Rysiah Saises, Chief Operations Section han OCD-8, ha pagkayana naieksperyensyahan ha Tropical Pacific an epekto han moderate tikadto ha strong El Niño. Pero ha Eastern Visayas, diri pa sugad kakusog an epekto hini kumpara ha iba nga mga lugar.
Dugang pa ni Saises, usa ha mga rason nga diri pa grabe an epekto han El Niño ha rehiyon mahitungod han pagkamay-ada pa mga source hin tubig ngan mga irrigation system nga padayon nga nag-ooperate.Ha luyo hini, mayda na gihapon mga lugar nga nakakaeksperyensya hin epekto, labi na ha sektor han agrikultura.
Ha datos han Department of Agriculture, 4,918 nga parag-uma ha Leyte an apektado han El Niño, samtang 3,046 hectares han mga pananom pareho han humay, mais ngan iba pa an totally damaged. Mayda liwat 1,230 hectares nga partially damaged, nga nagkakantidad hin P209 milyon kun diin ini nga mga datos in tikang la ha Leyte.
Dugang ni Saises, ha pagkayana, amo pa la ini an mga datos nga nagpapakita han mas grabe nga epekto han El Niño ha mga lugar ha rehiyon. Tungod hini, padayon an koordinasyon han OCD upod an mga concerned agencies ngan ginhihimo an kinahanglanon nga mga pitad agud maibanan an posible nga epekto han Super El Niño ha Eastern Visayas.
