Nagpahimatngon an Tacloban City Hospital nga an padayon nga kapaso han panahon in posible magresulta ha pagdamu han mga kaso han magkadurudilain nga sakit, lakip an heat-related illnesses, diarrhea, dengue ngan leptospirosis.
Sumala kan Dra. Gloria Fabrigas, Chief of Hospital han Tacloban City Hospital, damo an nagpapakonsulta tungod hin influenza-like illness pareho han masakit nga kalawasan, sip-on ngan ubo, samtang padayon an mga kaso hin hypertension ngan stroke.
Dugang pa ni Fabrigas, samtang nagtitikapaso an panahon, mas nagigin aktibo an mga lamok, nga usa han mga rason nga kinahanglan magin mabinantayon an publiko kontra dengue. Kun diin kadam-an han ira mga pasyente nga may dengue amo an mga kabataan nga lima tubtob 14 anyos.
Hingyap ni Fabrigas nga diri na umabot ha bleeding an mga pasyente, tungod kay an pagdurugo in han seryoso nga komplikasyon han dengue ngan pwede magkinahanglan hin blood transfusion.
Ginpahinumdoman liwat ni Fabrigas an publiko nga magin alerto ha pag-ataman han ira panlawas durante han kapaso han panahon ngan diri basta-basta tumumar hin mga over-the-counter nga medisina. Mas maupay, sumala ha iya, nga magpakonsulta anay ha health professional antes gumamit hin medisina.
