Ginkaro han Professional Regulation Commission (PRC) Region 8 an mga protocol ha pagpasulod han mga gamit ha examination room, kasunod han nagviral nga insidente durante han September 2026 Licensure Examination for Professional Teachers (LEPT).
Sumala kan PRC-8 Regional Director Armond Englis, mayda klaro nga mga patakaran an PRC ha mga gamit nga diri pwede dad-on ha examination room ngan ha mga gamit nga gintutugotan gamiton han mga examinees. An mga protocol, sumala ha iya, in ginhimo agud maproteheran an integridad ngan patas nga pagdumara han licensure examination.
Ginpahayag ni Englis nga usa ka semana ugsa han September 20 LEPT, nagpagawas na an PRC hin pahibaro ha social media mahitungod han mga prohibited items, pareho han mga examination materials, bags, review materials, cellphones, wristwatches ngan iba pa nga mga gamit nga diri kinahanglan ha pagkuha han eksaminasyon.
Lakip ha mga strictly prohibited an libro, notes ngan review materials nga may encoded nga data, information ngan formula, pati an programmable calculators. Samtang, scientific calculator la an gintutugotan, ngan para la ini ha mga examinee ha Mathematics major. Bawal gihapon an smartphones, smartwatches, earplugs, ngan iba pa nga Bluetooth-enabled devices nga pwede gamiton ha pakigkomunikar ha gawas han examination room.
Samtang, ginpahayag naman ni Englis nga may mga report mahitungod han pagkawara han mga gamit han mga examinees dida han nahitabo nga insidente durante han September 2026 Licensure Examination for Professional Teachers (LEPT) , pero tubtob yana, waray pa personal nga nagreport hini ha ira opisina.
