ODD NEWS – Usa nga wig maker ha Nigeria an nakaghipatik hin world record mahuman nga maghimo hin pinakahalapad nga wig ha bug-os nga kalibutan.
Ginkumpirma han records keeping organization nga Guinness World Records, nga hi Helen Williams an pinakabag-o nga record holder han titulo nga “Widest Wig” mahuman ine nga makabug-os hin peluka nga may kahalapad nga 11 feet and 11 inches.
Kun igkukumpara ine ha usa nga butang, in mas halapad pa ine kumpara ha kotse nga Mini Cooper nga may sukol nga 11 feet and 10 inches.
Gintikangan ni Williams nga himuon an record breaking wig dida han Pebrero, ngan nahuman niya kahuman han usa kabulan.
Agud makompleto an wig, gin kinahanglan niya hin 800 nga bundle hin buhok. Dako nga parte hine in gintahi niya gamit an iya kamot ngan an pira naman in ha sewing machine.
Para naman mas magin maupay ngan maranggat ine ha mga litrato, in ginbutangan ine niya hin 1,000 kabug-os nga rhinestones.
Mababaruan nga dire ine an syahan nga Guinness World Record ni Williams, matungod nga han tuig 2023 in nakakarawat ine an titulo nga “Longest Handmade Wig” nga may kahalaba nga 1,152 feet.
