DUHA nga Guiness World Record an nahipatik han usa nga 97-anyos nga lola ha United Kingdom mahuman hiya umapi ha wing walking ngan magin kaparte pa han usa nga loop-the-loop maneuver samtang aada ha kalalangitan.
Nakuha ni Betty Bromage an records nga “oldest wing walker (female)” ngan “oldest person to perform a loop-the-loop wing walk (female)” ha edad nga 97 years ngan 123 days old.
An wing walking in usa nga stunt kun diin an usa nga tawo in natukdaw o nakahigot ha igbaw han pako han eroplano nga nalupad. Gindumara ni Betty an stunt dida han Agosto 4 agud makatirok hin pondo para ha usa nga hospital charity.
Dire na bag-o kan Betty an wing walking. Siyahan niya nga nakuha an “oldest wing walker” record dida han 2022, han hiya in 93 years old. Ha pinaka-urhi nga attempt, die la niya nalahusan an kalugaringon nga record kundi nadungan pa ini hin bag-o.
