NATIONAL – Igin pahayag ni Philippine Coast Guard (PCG) Spokesperson Commodore Jay Tarriela nga magsangkay na hira ni SAGIP party-list Rep. Rodante Marcoleta mahuman an usa nga mapaso nga diskusyon kasumpay ha kontrobersyal nga pahayag han magbabalaod kasumpay ha West Philippine Sea (WPS).
Nagtikang an dire pagkakaintindihay ha usa nga pagdungog ha Kamara dida han Martes kasumpay ha online disinformation, kun diin ginpakiana ni Marcoleta an mga pahayag ni Tarriela kabahin ha pagtawag hine ha iya nga “traydor”.
Kun diin, dayun naman ine nga igindiwara ni Tarriela.
Gin pirit hi Tarriela nga ig eksplikar kun kay ano waray hine dayun balyua an sayop nga impormasyon, kun diin, sumala pa hine, dida la ine hibaro han isyu kahuman liwat han interview ni Marcoleta kun diin gin tawag hiya nga “ignorante”.
Sugadman, kahuman han mapaso nga away in ginpaangbit ni Tarriela nga dumaop ha iya hi Marcolet ngan nakipaglamano daw ine haiya.
Sumala kan Tarriela, ginmalatumat daw ni Marcoleta nga “nothing personal” ine, kun diin dugang pa hine, “close” na hira ni Marcoleta.
Han mapakianhan naman kun nahuman ba an ira dire pagkakaintindihay kasumpay ha pagigin lehitimo han West Philippine Sea, ginmalatumat la ni Tarriela nga an mga pahayag ni Marcoleta in nagpapakita hin pagkilala ha mga teritorial claims han Pilipinas.
