NATIONAL – Nakighampang hi Presidente Ferdinand Marcos Jr., kan Central Intelligence Agency (CIA) Director John Ratcliffe ha Washington, D.C. dida han nakalabay nga adlaw, Hulyo 21.
Kaupod han Presidente ha nasabi nga pagharampang hira National Security Council (NSC) Secretary Eduardo Año ngan Defense Secretary Gilberto Teodoro.
Pira nga importante nga istoryahon an ginhingadayan pero waray na ine igpaangbit pa ha media.
An CIA in usa nga US government agency nga naghahatag hin mga objective intelligence ha mga langyawanon nga nasud ngan ha mga pankalibutan nga isyu ha Presidente, National Security Council ngan ha iba nga policymakers.
Hi Ratcliffe in gintudlok kumo CIA Director dida han Enero 23, 2025.
Hiya an anay Director han National Intelligence.
Magkaduru-dilain naman nga harampang an gin atenderan han Presidente samtang nakadto ine ha Washington para han iya tulo kaadlaw nga Official visit.
