METRO MANILA – Ginpahayag han usa nga eksperto tikang ha Bureau of Investigation nga mayda nakakapausa ha pira acknowledgement receipts nga gingamit kumo pamatuod ha confidential funds han Office of the Vice President ni Vice President Sara Duterte.
Ha pagdungog han House justice committe, ginmalatumat ni forensic document examiner Carolyn Moldez-Pitoy nga ha 36 nga resibo nga ginpangita, may mga higayon nga an mga dokumento in nakangaran ha magkadurudilain nga tawo pero may pagkakaparehas an penmanship ngan pirma.
Kaupod ha mga pananglitan an mga resibo nga nakangaran kanda “Sheila Dado” ngan “Sally Rendon” nga sumala ha eksperto in may kaparehas nga estilo han pagsusurat.
May iba pa nga grupo han resibo nga nakangaran kanda “Jason Bitangcol,” “Selsa Arojable,” “Samson Samuel,” ngan “Sabel Salazar” nga may kaparehas hiton handwriting characteristics.
Sumala pa ha NBI, may mga petsa gihapon ha mga resibo nga posible ginsurat han u-usa la katawo, basar ha pangita han ira handwriting patterns.
Ginmalatumat han eksperto nga basar ha pangita han orihinal nga kopya nga kapot hgan Commission on Audit, may mga grupo han acknowledgement receipts nga posible nagtikang ha sayop nga paggamit han confidential funds.
Samtang, nakaiskedyul naman an masunod nga hearing han komite ha maulpot nga Abril 22, 2026.
