METRO MANILA – Dire la anay i-ibanan o sususpendiron han gobyerno an buwis ha diesel ngan gasolina mahuman an pangita han Department of Finance ngan han UPLIFT Committee.
Gineksplikar ni Finance Usec. Karlo Adriano nga kinahanglan mag-hirot an gobyerno ha paggastos, labi na mga may nauna na nga pitad hi Presidente Ferdinand Marcos Jr. nga tanggalon an buwis ha LPG ngan kerosene.
Mahitungod hini, ginbabana-bana nga aada ha P4.1 bilyon dayon an mawawara ha halin han gobyerno ha sakob han tulo ka-bulan.
Kun igdudugang pa an diesel ngan gasolina, posible umabot ha P43.6 bilyon an mawawara nga halin sanglit dire ini an nakikita nga praktikal ha pagkayana.
Imbes, gintutotukan yana han gobyerno an panhatag hin ayuda o bulig nga diretso ha mga pinaka-apektado.
