NATIONAL NEWS- Gin-ayat ni Senate Deputy Minority Leader Risa Hontiveros hi Pangulong Ferdinand Marcos Jr. Nga manguna ha pagpailarom han lifestyle check ha butnga han kontrobersiya ngan imbestigasyon kasumpay han maanomalya nga flood control projects.
Gindig-unan ni Hontiveros nga kun nagmando an Pangulo hin lifestyle check ha mga opisyal han gobyerno, angay la nga magpakita ine hin halimbawa pinaagi han pagsasapubliko han iya Statement of Assets, Liabilities, and Net Worth (SALN).
Gintagan gihapon hin duon ni Hontiveros nga kun limitado la ha ehekutibo an lifestyle check ni Pangulong Marcos, pwede gihapon boluntaryo nga maki-usa dinhi an Kongreso ngan Hudikatura.
Dugang pa hine, may gahom an Senate President, House Speaker, ngan Chief Justice han Korte Suprema nga aghaton an mga senaodr, kongresista, ngan mahistrado nga iglantad ha publiko an ira SALN ngan ipanginanu an ira panginabuhi.
