Gin pa batian ni Senate President Alan Peter Cayetano an minorya han Senado kasumpay ha mga pakaraot ha iya liderato.
Ha usa nga press conference han Biyernes, Mayo 15, 2026, igin duon ni Cayetano nga baga hin an atensyon han bag-o nga minorya in ha 2028 National Elections kuntra ha presente nga trabaho ha Senado.
Igin diwara gihapon hini an mga alegasyon nga nagin masamok an Senado tikang han hiya an lumingkod kumo lider han kapulungan.
Dida han Lunes, Mayo 11, nagbuhat hin Senate coup an Duterte bloc nga kaparte hi Cayetano, nga nagresulta ha pagkakapaiwas kan Sen. Tito Sotto III kumo Senate President.
Ha botos nga 12-9, nakuha ni Cayetano an liderato han Senado, samtang nag-abstain naman hira Sen. JV Ejercito ngan Sen. Migz Zubiri.
Kasunod han reorganisasyon, igin deklara nga bakante an tanan nga posisyon ha Senado, kaupod na an mga committee chairmanships, nga nagin rason han pagkansela han pira nga mga hearing han mga komite.
Ha pagkayana, hi Cayetano in ika-tulo na nga Senate President tikang han mag abre an an 20th Congress dida han 2025.
Manunumduman nga hi Sen. Chiz Escudero an siyahan nga Senate President han 20th Congress ugsa hiya mapaiwas ha iya pwesto pinaagi hin kudeta nga gin pangunahan han faction ni Sen. Sotto.
Ha pagkayana, nagin kontrobersyal an pagkakalingkod ni Cayetano kumo Senate President mahuman an insidente han daw purugsilay ha butnga han Office of the Sergeant-at-Arms (OSAA) ngan mga operatiba han National Bureau of Investigation (NBI) kanit ha nakatalaan nga pag-aresto kan Sen. Ronald “Bato” dela Rosa dida han nakalabay nga Miyerkules, Mayo 13.
