METRO MANILA – Ginduon han pira nga manbaralaod ha Kamara de Representantes nga waray hira gintalapas nga balaod mahuman igbuyagyag ha publiko an bank accounts ni Mans Carpio, asawa ni Vice President Sara Duterte, ha hearing han House Comittee on Justice kasumpay han impeachmnent case han Bise Presidente.
Ha pag-atinder ha Quezon City Prosecutor’s Office ni Mamamayang Liberal Rep. Leila de Lima, kaupod hira Akbayan Reps. Chel Diokno ngan Perci Cendaña, ginyakan hine nga usa la nga “diversion” ha tunay nga isyu an reklamo ni Carpio, diin maikokonsidera ine nga harassment kontra ha ira.
Subay kan Cendaña, ginhihimo la nira an ira mga trabaho kumo mga manbaralaod, samtang ginduon naman ni Diokno nga kinahanglan gamiton an balaod agud dire samukon an mga opisyal nga ginbubuhat la an ira mga responsibilidad.
Ha kampo naman ni Carpio, ginpahayag han iya abogado nga gintalapas an privacy hine han ig-buyagyag ha hearing an records tikang ha Anti-Money Laundering Council (AMLC).
Samtang, nangangandaman na an prosecution team han Kamara para ha impeachment trial ni VP Sara Duterte nga nakatalaan magtikang ha Mayo 18.
Subay kan Manila 1st District Rep. Joel Chua, gintutuhay na nira an mosyon, ebidensiya, testigo, ngan mga legal nga argumento para hiton hearing.
