TACLOBAN CITY- Waray pa magkomento an pamilya Espinosa ha guin pagawas nga konklusyon han mga otoridad may kalabutan ha pagkamatay ni Rolando Espinosa Sr.
Manunumduman nga diri pala iha nga guinpagawas han Joint Committee han Public Order and Dangerous Drugs ngan han Committee on Justice and Human Rights an konklusyon hini ha imbestigasyon ha pagpatay kan anay Albuera, Leyte Mayor Rolando Espinosa Sr.
Basi ha report nga planado daw han mga operatiba tikang ha Criminal Investigation and Detection Group Region 8 (CIDG-8) an pagpatay kan Espinosa dida han nakalabay nga Nobyembre han tuig 2016.
Nakabutang guihapon ha report nga panuyo han mga opisyal han CIDG-8 nga nagsirbi hin search warrant ha Baybay Provincial Jail nga tahuban an ira kalugaringon ha pagkarawat hin payola tikang kan Espinosa.
Manunumduman nga lakip ha mga akusado nga kapulisan hira CIDG-8 chief Supt. Marvin Marcos, Chief Inspector Leo Laraga ngan Supt. Santi Noel Matira.
Mababaruan nga umabot ha natura nga konklusyon an joint committee base ha testimonya han self-confessed Eastern Visayas drug lord ngan anak han Alkalde nga hi Kerwin Espinosa.
