Kumalagiw na an mga Palestino tikang ha pira nga parte han Gaza City mahuman nga tikangan na han Israel an syahan nga yugto han ira planado nga ground offensive.
Ginatos-gatos nga Palestino ha Al-Zeitoun ngan Al-Sabra neighborhood han Gaza City an nagbakwit tikadto ha amihan-katundan nga parte han syudad mahuman an magkusog nga pambobomba ha lugar nga iginkaguba han mga balay, ngan igin kamatay han dose-dosena katawo kaupod an mga pamilya nga nakada ha tent ngan kabalayan, sugadman an pira nga mga inosente nga kabataan, subay ha international media.
Sumala ha tagapagyakan han Israeli Defense Forces, nagdumara na hin operasyon an ira mga tropa ha Seitoun ha Jabalia areas para ha occupation plan mahuman nga aprubahan ni Defense Minister Israel Katz.
Maabot ha 60,000 reservists an iginpatawag ha pagtitikang han Setyembre para igdeploy kaupod an active-duty personnel para ha operasyon.
Iginpahayag naman ni Israeli Prime Minister Benjamin Netanyahu nga ginpahalipot hine an timelime agud makubkob an gintatawag hine nga katapusan nga kuta han terorista nga Hamas ha Gaza.
