NATIONAL NEWS– Kampante hi Justice Usec. Raul Vasquez nga dire magigin balaong ha case build up nga ginbuhat han Department of Justice an pagpapasaka han negosyante nga hi Atong Ang hin kaso kontra kan Alyas Totoy.
Nagdig-on hi Vasquez, nga an pagpapasaka han kaso kontra kan Alyas Totoy in usa ha mga ginlalauman han ahensya nga legal development samtang nagpapadayon an imbestigasyon ngan ginbubug-os an kaso.
Kaparte la ini han legal strategy han bisan hin-o nga dabi ha usa nga krimen.
Dida han nakalabay nga adlaw July 3, in opisyal nga ginsumite han kampo han negosyante an mga kaso nga iginsalawad kontra kan Alyas Totoy sugad hiton violence against or intimidation of persons, grave threats, grave coercion, slander ngan iba pa.
Sumala kan Usec. Vasquez, magpapadayon la gihapon an imbestigasyon han DOJ kun diin igkukusidera han ahensya an tanan han ebidensiya nga padayon nga nakakarawat nira kaupod an testimonya han mga nagpakilala nga may kalabutan ha mga nawawara nga parag-bulang.
Samtang, bumaribad naman nga maghatag hin komento an opisyal kun aada na ha kostudiya han DOJ hi Alyas Totoy kasunod han pag-presenta hini dida han nakalabay.
