NATIONAL – Gintagan-duon han Palasyo han Malakanyang nga an tinuod nga suklanan han pampubluko nga serbisyon in kun napapaupay an kinabuhi han mga residente.
Ine in igin pahayag ni Executive Secretary Lucas Bersamin ha butnga han pinaka-urhi nga SWS survey nga nagpapahayag nga 59% han mga Pilipino in nagyayakan nga kuntento hira ha Marcos administration.
An survey, sumala kan Bersamin in nagseserbi nga suklanan han opinyon han publuko pati na han suporta ha mga polisiya nga iginlalatag han gobyerno.
Sugadman, an karuyag daw nira in maaabat han mga molupyo an epekto han ira paningkamo ngan masusukol ine kun naupay na an kinabuhi han mga Pilipino.
Nagpaabot naman hin pasasalamat hi Bersamin ha daw positibo nga resulta han survey, kun diin nagawas nga kuntento an kadam-an ha ginbubuhat nga pagbaton han administrasyon ha mga kalamidad, paghahatag hin edukasyon, ngan paningkamo nga mapaursa an kinabuhi han mga nagkukuri ngan makapaghatag hin trabaho ha ngatanan.
