Humitaas ha bag-o nga rekord nga P17.707 trilyon an kabug-usan nga utang han Pilipinas ha paghuhuman han tuig-2025, mahitungod han paghinay han kabalyo han piso ngan kadugangan nga pangutang para ha mga proyekto ngan programa.
Subay ha pinakaurhi nga datos han Bureau of the Treasury (BTr), lumubo hin 10.32% an utang han gobyerno tikang ha P16.051 trilyon dida han 2024 tikadto ha P17.707 trilyon dida han 2025.
Dako nga parte han utang in tikang ha sulod han nasud o domestic debt, nga nagbubug-os ha 68.4 porsyento han kabug-usan nga utang, samtang an nasasalin nga 31.6 porsyento in tikang ha gawas han nasud o foreign financiers, nga apektado han pagbabag-o ha exchange rates ngan interest rates.
Ada ha P12.116 trilyon an domestic debt, samtang ada naman ha P5.591 trilyon an external debt.
Samtang, nagpahayag naman hin pagkabaraka an usa nga ekonomista tikang ha Ateneo de Manila University nga nagyakan nga “nakakaalarma” an sitwasyon, mahitungod nga daw limitado na an opsyon han gobyerno, labi na nga naaatubang an nasud ha mga isyu han korapsyon.
