NATIONAL– Nagtutuo hi anay chief presidential legal counsel Atty. Salvador Panelo nga an baribad hiton Office of the Solicitor General (OSG) nga depensaran an mga opisyal hiton gobyerno kasumpay ha ginhaon nga habeas corpus petitions ha pag-aresto kan anay Pangulong Rodrigo Duterte, in pag-amin nga waray hurisdiksiyon an International Criminal Court (ICC) ha Pilipinas.
Ine an nagin pahayag ni Atty. Panelo mahuman an paghaon hiton manifestation of recusal ni SolGen Menardo Guevarra ha Korte Suprema kun diin bumaribad ine nga magin tinaglawas hiton gobyerno kontra ha ginhaon nga petisyon han kampo ni anay Pangulong Duterte, matungod nga posible dire hiya magin epektibo ha pag presentar hiton mga respondent tungod nga naninidugan ine nga waray hurisdiksiyon an ICC ha Pilipinas.
Dugang pa ni Atty. Panelo, an nasabi nga pitad han SolGen in pag-amin han abogado hiton gobyerno nga iligal ngan unconstitutional an pag-aresto, pagdetine ngan pag-kidnap ha anay Pangulo.
Ginatagan pa hin duon ni Atty. Panelo nga an ginhimo han gobyerno nga pagpapatuman hin warrant of arrest tikang ha usa nag institusyon nag waray hurisdiksiyon ha nasud in maikokonsidera nga iligal.
Sanglit nga sakto an ginhimo han SolGen nga manindugan matungod nga waray hurisdiksiyon an ICC ha nasud.
Manunumduman, hi Atty. Panelo an naghaon ha Korte Suprema hin petition for habeas corpus ni Davao City Mayor Sebastian Duterte kontra ha mga opisyal han gobyerno ha daw pagdetine, pag-kidnap ngan pagtubyan ha anay Pangulo ha foreign institution.
