SPORTS – Nakakarawat hin pagdayaw ha magkadurudilain nga boksingero ha kalibutan an nagin laban ni eight-divising boxing champon Manny Pacquiao kan Mario Barrios han US.
Bisan man naghuman ha majority draw an mulay in napabilin ni Barrios an iya WBC welterweight belt in dire la gihapon nawawara an paghanga han pira nga mga boksingero ha 46-anyos nga Pinoy boxer.
Nanguna an Cuban boxer nga hi Yordenis Ugas nga dumayaw kan Pacquiao kun diin, nahikalasan nala ini nga utro nagmulay hi Pacman mahuman niya pirdehon ini dida han nakalbay nga 4 ka-tuig kontra ha mas bata pa nga boksingero nga an agwat in 16 ka-tuig.
Dako gihapon an respeto nga ginpakita ni anay WBO junior lightweight titleholder Jamel Herring ngan anay IBO lightweight title holder George Kambosos Jr.
Sumala han mga ini nga insipirasyon nira hi Pacquiao mahitungod ha kakarit hini ha boxing ring ha luyo han edad hini.
