TACLOBAN CITY – Gin aresto han pinag- usa nga pwersa han kapulisan ngan Philippine Coast Guard an usa nga opisyal han pampasahero nga barko tungod han gin- aalegar ilegal nga posisyon hin mga armas.
Sumala kan Lt. Paterno Belarmino, head han Coast Guard ha Northern Samar, iton nadakop in ginkilala kan Jhunry Manulat, 40 anyos, taga Danao, Cebu City ngan second mate han M/V Nathan Matthew.
Nadakop an suspek samtang nagdudumara hin pre-inspection an mga otoridad ha barko nga MV Nathan Matthew ha Jubasan Port, Brgy. Jubasan, Allen, Northern Samar, banda alas 2:30 han kulop (Oktubre 2 ).
Sumala pa kan Belarmino nga ha bulig liwat han mga K9, natad-an an mga armas ngan bala nga gintago han suspek ha igbaw han iya cabin.
Nakuha tikang kan Manulat an usa kalibre 45 nga pistola, usa 357 Magnum revolver, duha nga magazines hin kalibre 45 nga pistola ngan iba iba nga klase hin bala.
Ha impormasyon han Philippine Coast Guard, tikang daw Danao, Cebu City an mga pusil nga ginbabaligya han suspek ha mga buyers hini ha iba iba nga bungto han Northern Samar sugad nala han Capul, San Vicente ngan mismo ha Allen.
Ginbabaligya daw an mga pusil ha kantidad nga 10,000 kutob 15,000 depende ha klase.
Waray naman umato an suspek han gin aresto ini han mga otoridad ngan yana in naatubang ha kaso nga illegal possession of firearms and ammunitions.
