TACLOBAN CITY– Padayon an monitoring han Office of the Civil Defense OCD-8, may kalabutan han Tropical Depression Wilma, nga ginlalauman nga magla-landfall yana nga gab-i o buwas ha Sinirangan Bisayas.
Sumala kan Sher Rysiah Saises, Information Officer Office of Civil Defense Vlll, ngada yana an Naval Biliran pala an nagpalusad hin abiso ngan nagpatuman hira hin force evacuation, ilabi na para hadton mga nag-uukoy hirani ha hamubo nga mga lugar.
Hapagkayana, nakakarawat na hira hin report nga 6 nga sea ports ha Sinirangan Bisayas an nagpatuman hin kanselasyon nga nagbabawal pagpalawod han mga sarakyan pandagat.
Samtang, 91 naman nga eskwelahan an nagpatuman hin ha bug-os nga rehiyon hin class suspension tungod han bagyo Wilma.
Mayda liwat mga lugar nga nagkansela an trabaho ha mga pampubliko nga opisina.
Dugang pa ni Saises naka pre-position naman an mga relief goods ngan non-food items nga pwede ipanhatag kun an mga LGU in nanginginahanglan hin kadugangan nga suplay.
