METRO MANILA – Ginayat ni Presidente Ferdinand Marcos Jr. an mga nagyayakan nga hiya in may sakit nga pumakadto ha Malakanyang ngan updan hiya mag-ehersisyo.
Sumala ha presidente, puydi hira mag-gym ngan dinhi na la ha Palasyo pamatud-an kun hino an mas makusog magbuhat hin weights.
Duon han presidente, dire hiya naasa ha supplements ngan mas importante an insakto nga pagkaon, regular nga ehersisyo, ngan sakto nga katurog, bisan aminado hiya nga danay kulang hiya ha pahuway.
Dugang pa niya, haros tulo ka-bulan na hiya dire napakadto ha ospital.
An urhi niya nga check-up in an nagpailarum hiya ha CT scan para ha iya diverticulitis, nga yana in natambal na.
Duon han presidente, dire tuoran an mga nagsasarang nga notisya nga hiya in may sakit o baldado tungod nga ini in mga fake news la.
