WASHINGTON D.C., USA – Gintikangan na han US military an blockade ha Iranian ports dida han Lunes, Abril 13, mahuman nga bumaribad an Iran nga sumurender ha kaluyo han mga pahimatngun.
Sumala ha US Central Command, nagbuhat hira hin blockade ha pagsulod ngan pag-gawas han Iranian ports dida han alas 10:00 han aga, eastern time o alas 11:00 han gab-i, oras ha Pilipinas.
Pero ginklaro han US military nga dire hini babalabgan an mga barko nga naagi ha Strait of Hormuz, nga nabiyahe pakadto ngan tikang ha iba nga mga nasud.
Ginbuhat han US military an pahayag mahuman ginmalatumat ni US President Donald Trump nga magpatuman hin blockade ha mga aragian han mga barko nga nagdadara hin mga lana ngan nagtarhog nga babalabgan han US an tanan nga barko nga masulod ngan magawas ha Hormuz.
Samtang, nagpahimatngun naman an Iran’s Revolutionary Guard nga an pagdaop han military vessels ha Hormuz Strait in matutudlok nga pagtalapas ha presente nga ceasefire ngan nagpatapud nga mabulos an mga ini.
