TACLOBAN CITY – Gindumara han Department of Social Welfare and Development Region 8 dida han Abril 8, an cash relief assistance para ha mga tricycle drivers nga apektado han paghitaas han lana ha Pilipinas kasunod han tensyon ha Middle East.
Maabot ha P47 milyon an naihatag han buhatan ha 9,569 nga benepisyaryo ha Sinirangan Bisayas nga natagan naman hin P5,000 kada tagsa.
Sumala naman kan DSWD 8 Regional Director, Grace Subong nga target naman han buhatan yana nga Abril 16 an makaghatag hin bulig ha maabot 136 nga iba pa nga munisipalidad ha rehiyon kasumpay na gihapon han pag-araba han iba nga tricycle drivers nga waray pa makatagamtam.
Dugang pa han opisyal nga nakikipag-koordinar na hira ha kada munisipalidad para ha kompleto nga listahan han mga benepisyaryo.
Ginsigurado naman han buhatan nga patas an ira pag-verify ngan tanan in matatagan hin P5,000 nga bulig.
