SAN ANTONIO, SAMAR – Naaresto na han mga tinaglawas han San Antonio Municipal Police Station ha gindumara nga hot pursuit operation an suspek ha nahitabo nga pamusil ha Brgy. Ward III, San Antonio, Northern Samar dida han nakalabay nga adlaw.
An mga biktima in usa nga 64-anyos nga lalaki, operator hin motorbanca, ngan usa nga 22-anyos nga lalaki, usa nga laborer, samtang an suspek naman in usa nga 41-anyos nga negosyante nga lalaki, paprehas mga residente han nasabi nga lugar.
Sumala kan Northern Samar Police Provincial Office Provincial Community Affairs & Development Unit Chief, PLt. Col. Harris Rebato, away pagtaga-tuna an rason han pamusil.
Basar ha inisyal nga imbestigasyon, nagkamay-ada hin mapaso nga argumento an suspek ngan an bugto nga babaye han biktima mahitungod ha dire pagkaka-intindihay ha pagtaga-tuna.
Dumuro daw an sitwasyon mahuman nga maki-api an iba nga membro han pamilya nga nagduso ha suspek agud kuhaon an iya Norinco 9mm nga pusil ngan ginpapamumusil-patay an biktima.
Dayun naman nga gindara ha hospital an 64-anyos nga biktima, pero gin deklara ine nga dead-on-arrival mahuman nga mag-angkon hin damo nga inig-an hin bala ha mga dughan, samtang an 22-anyos naman nga biktima in nag-angkon hin igo ha mga sugbong hine.
Samtang, ginbasahan naman anay han iya mga katungog ha konstitusyon an suspek ugsa ine arestuhon han mga otoridad.
