TACLOBAN CITY – Padayon nga ginpapakusog han mga iskuylahan kaupod an Department of Social Welfare and Development an literacy skills ngan suporta ha mga kabataan ngan pamilya nga nagkikinahanglan hin intervention pinaagi han Tara Basa Tutoring Program ha Tacloban City.
An mao mangud nga programa in usa nga community-based social portection initiative nga may panuyo nga buligan an mga kabataan nga nakukurian nga magbasa, samtang gintatagan gihapon hin oportunidad an mga Youth Development Workers ngan istudyante ha kolehiyo nga magin tutors labi na ha ilarum hiton kurso ha edukasyon.
Ha ilarum han programa, an mga college student nga kadam-an tikang ha mga partner institutions sugad han Eastern Visayas State University ngan Leyte Normal University nga nailarum anay hin training ugsa magin reading tutors ha mga pampubliko nga iskuylahan.
Labot la ha pagtututdo ha mga kabataan, kaupod gihapon ha ginpapakusog nga programa an pagdudumara han “Nanay-Tatay sessions” para ha mga kag-anak, kun diin gintututduan hira magin aktibo nga kaupod ha edukasyon ha ira mga anak.
Dida han nakalabay nga tuig 2025, ginbuhat an Memorandum of Agreement signing ha butnga han DSWD, lokal nga pangobyernuhan han Tacloban, Department of Education, ngan mga state universities agud mas mapahaluwag pa an implementasyon hini ha rehiyon.
Target han programa nga mapahitaas an literacy rate ha rehiyon ngan mapakusog an sumpayan han iskuylahan, pamilya, ngan komunidad ha pagpakusog han edukasyon para ha mga kabataan.
Samtang, madalagan naman an programa hin 20 ka-diyas nga kun diin nagtikang na ini tikang dida han Abril 15 ha mga pampubliko nga iskuylahan ha syudad.
