HINABANGAN, SAMAR – Nagdumara hin duha nga focused military operations kontra ha Communist Terrorist Group an tropa han gobyerno ha probinsya han Samar dida han mga nakalabay nga adlaw, kun diin nagresulta ini hin mga engkwentro.
Sumala kan 8ID Philippine Army Division Public Affairs Office, CPT. Christopher Tataro, nga na-engkwentro han 81st Division Reconnaisance Company an grupo han armado nga miyembro han walhon nga grupo nga gintutuohan nga tikang ha Yakal Platoon, SRC Browser ha tay-aw nga parte han Barangay Pamamas-an, Motiong, Samar kun diin, nagkamayda hin 20 ka-minutos nga pagbalyuay hin buto hin pusil ugsa naman kumaligiw an mga miyembro han walhon nga grupo.
Samtang, ha sumunod naman nga adlaw, in nagdumara hin operasyon an tropa han 81st DRC kaupod an 46th Infantry Battalion, kun diin, nakaenkwentro an mga ini hin lima nga miyembro han Communist Terrorist Group ha Barangay Pamamas-an, Caulayanan, Samar, nga gintutuohan nga kaparehas nga grupo han naka-engkwentro han mga tropa dida han nakalabay nga adlaw.
Nagresulta an operasyon hin pag-angkon hin kasamdan han usa nga sundalo ngan pagkamatay naman han duha nga gintutuohan nga miyembro han walhon nga grupo, ngan pagrekober naman han usa M14 rifle, usa nga cal.45 nga pistol ngan iba pa nga higamit.
Samtang, padayon naman nagbubuhat an tropa han gobyerno kaupod ha pakipagkoordinar han local government units ngan partner agencies hin mahugot nga pagpatrolya agud masigurado an seguridad han mga molupyo ngan mapuypuy an insurhensiya ha lugar.
