SAMAR – Malipayon nga ginpaangbit ni SAMELCO II Institutional Service Department Head, Decson Bernales nga humamubo hin P13.70 per kilowatt-hour imbes nga P14.35 per kilowatt-hour an sukot han kuryente para ha mga nasasakopan han mao nga Electric Cooperative.
Sumala kan Bernales, nga usa nga rason han paghamubo han sukot han kuryente para han bulan han Marso ngan Abril in mahitungod ha paghamubo han generation charge.
An generation charge mangud in an bayad han mga konsumidor ha mga nagsu-supply hin kuryente o an mga Generation Companies. Ini in ginkokoleta kaupod han binulan nga bill ngan nangangadto ha mga supplier han mga kuryente kumo kabaraydan.
Dugang ni Bernales nga mahitungod nga mayda pa supresyente nga suplay han kuryente ugsa an nahitabo nga krisis ha lana ha nasud, in waray mag-umento an presyo han kuryente karuyag signgon, nga an nabibilin nga stock hini an gingagamit han mga konsumidor.
Posible gihapon nga mayda pa nabibilin nga “uring” o coal nga amo an gingagagamit agud makaghimo hin kuryente o waray pa kabubutngi hin presyo an mga bag-o nga deliver hini sanglit waray pag-umento ha sukot han mga power companies.
Ginaandaman naman han kooperatiba an paghitaas han sukot han kuryente ha mga masunod nga bulan mahitungod nga posible gamiton na han mga kumpanya an mga bag-o nga stock han ira uring ngan lana nga makakaapekto ha presyo hini.
Samtang, naghihingyap naman hi Bernales nga dire unta dako iton ig-umento han generation charge mahitungod nga magigin dako ini nga pas-anon han mga konsumidor labi na yana nga nakakaabat an tanan hin krisis.
