TOLOSA, LEYTE – Usa nga motorsiklo an nahulog ha nagpanpan nga parte han tuna ha may Brgy. San Vicente, Tolosa, Leyte, kakulop nga adlaw,
Ginkilala an mga biktima nga usa nga Chief Tanod han barangay, kun diin mayda ine mga backrider.
Sumala kan Tolosa, Leyte Municipal Disaster Risk Reduction Management Officer, Joselito Labata, dire an pagpanpan han tuna an rason han kahulog han motorsiklo kundi an kahipalid hine tipaubos dida han pag-agi han usa nga multicab.
Ha istorya han driver, dida han aga han nasabi nga adlaw samtang nagbibiyahe ine kaupod an iya kapamilya, in nakasul-ot ine hin raincoat kun diin samtang nagbibiyahe an mga ine in mayda hira igin kahitapo nga multicab, kun diin nahanginan an raincoat hine ngan baga-baga hin nahipalid an mga ine, mahuman nga waray na hine makabig an manibela han motor, rason han pagkahulog han mga ine ha ubos.
Waray naman daw barandillas ha nasabi nga lugar pero mayda ine nakabutang nga caution sign, nga an biktima pa mismo an nagtaod.
Gin aayad daw an kaluyo nga parte han salog kun diin gin ririp-rap ine, sanglit kun nabanda an tubig ha semento in nasampak liwat an balud hine ha kaluyo nga parte han salog nga nakakag-kawsa han pagparik han baras.
Dako naman daw naman an posibilidad nga magpadayon an pagpinanpan han karsada kun magpinadayon gihapon an nae-eksperyensyahan nga uuran ha rehiyon.
Samtang, talwas naman an ngatanan nga sakay han nahulog nga motorsiklo.
