TACLOBAN CITY – Patay an usa nga misis, mahuman ine nga panawtawon han iya ka- live in partner ha Brgy. 83-A Burayan, San Jose Tacloban City.
Sumala kan PCapt. Concas Castello, Station Commander hiton San Jose Police Station 1, selos an rason han panawtaw hiton suspek ha biktima.
Ginkilala an suspek kan Jason Roa, 28-anyos an pangidaron, ngan residente han Brgy. 83-A Burayan, San Jose Tacloban City, samtang an biktima naman in ginkilala kan Dailyn Tiu, 33-anyos an pangidaron, live-in partner han suspek ngan residente han kaparehas nga barangay.
Dagdag pa sa imbestigasyon na nagkamayda anay an duha hin diskusyon, ngan makalabay la an pira ka minutos in nag-aaro na hin bulig an biktima ha iya mga amyaw.
Dayon naman ine nga ginbuligan han iya mga amyaw, ngan tinmawag hin pulis.
Urhi na han umabot an mga kapulisan matungod nga nagkakarigo na ha iya kalugaringon nga dugo an biktima ngan waray na ine kinabuhi ha sulod han ira kwarto.
Nag-angkon naman hin siyam nga samad an biktima ngan nahisabtan gihapon nga an ira kitchen knife nga mayda kahalaba nga 13-inches an gin gamit han panawtaw ha biktima.
Dugang pa han mao nga opisyal, mayda na record hin pagkakapreso ha kaso nga physical abuse ha ira presinto an mao nga suspek ha kaparehas la gihapon nga biktima.
