TACLOBAN CITY– Gintagan hin pagklaro hiton Tolosa Municipal Police Station, an nagsarang ha social media nga screen shot messages, nga nakaghatag hin pagka-alarma ha mga indibidwal, an kasumpay ha gin-aaligar nga mayda usa nga estudyante an magbubuhat gihapon hin panmusil ha Tolosa National High School.
Dayon nga ginpanginano han mga otoridad, an nasabi nga screen shot messages, kun ine ba in tinuod.
Sumala PCPT. Jose Constiniano Jr. Acting Chief of Police Tolosa MPS, ine mangud in kanit ha natabo nga panhitabo ha syudad han Tacloban nga panmusil ha San Jose National High School.
Subay ha ira imbestigasyon, nahibaruan nira nga an nasabi nga screen shot message in hinimo la han usa nga estudyante pinaagi han iya dummy account, ngan kahuman in gin send ha ira group chat, kun diin dayon ine nga ginka-alarma han ngatanan.
Dugang pa hine, nga yana nga adlaw in ira ginpanginano an nasabi nga panhitabo, kaupod an tinaglawas han MSWDO, tungod nga minor de edad pa ine nga nagpasarang hiton mensahe.
Subay hiton ira pauna nga ginkikita nga rason kun kay-anu ginbuhat hiton nasabi nga estudyante, an nasabi nga pagpapadara hin mensahe, tungod nga karuyag niya nga makuha iton atensyon han iya kag-anak.
