NATIONAL NEWS– Ginsalawad han Akbayan Party-list an proposisyon nga “Lived Identities and Recognition Act” o “House Bill 9929, o “Sharmaine Bill.” komo kaparte han paghinumdom han Pride Month.
Sumala kan Akbayan Rep. Perci Cendaña, panuyo han balaudnon nga makilala an pangilal-an han mga transgender, intersex, ngan non-binary nga mga Pilipino pinaagi hin mas simple ngan mas masayon nga proseso agud parehas an ira legal nga ngaran ngan gender marker ha ira ginkikilala nga pangilal-an.
Dugang pa ni Cendaña, nga damo nga mga trans ngan intersex nga Pinoy an nakakaeksperyensya hin diskriminasyon tungod han mga ngaran ha ira legal na mga dokumento.
Ha ilarum han suhestyon, pwede mabag-o an mga ngaran ngan iba pa nga detalye ha mga dokumento nga diri kinahanglan umagi hin maiha ngan magasto nga proseso ha korte.
Sakop gihapon han suhestyon an mga survivors han gender-based violence ngan child abuse nga karuyag magbalyo han ira ngaran para han ira katalwasan ngan kaupayan.
