NATIONAL – Nagpagawas hin pagklaro an Department of Finance kasumpay ha Capital Markets Efficiency Promotion Act mahuman nga magsarang an mga post nga mapasaka hin buwis ha mga tirok ha bangko.
Sumala han DOF, waray bag-o nga buhis ngan lugod, gin-adjust an tax rate ha interest income tungod han diri patas nga sistema nga pabor la ha mga riko.
Base ha mga pag-aram ngan mga datos, sumala ha ira nga kadam-an han mga nagkakapot hin deposito nga may mas maiha nga maturity in amo an mga riko ngan may kaya.
Tungod hini, hira la an nagpapahimulos han preferential rates, mas hamubo nga buhis, ngan usahay waray ginbabayad.
Dugang pa han Finance Department nga diri tinuod nga bubutangan hin buwis an savings han mga may deposito ha bangko.
Ginmalatumat liwat nira nga tikang han tuig 1998, nagkamay-ada hin 20 porsyento nga buhis ha interes nga nakuha han mga ordinaryo nga deposito ha bangko subay han Tax Reform Act of 1997.
Nagpapahinumdom gihapon an departamento ha publiko nga maghirot ha mga online content nga ginhimo para magpasamwak hin sayop nga impormasyon.
