Nagpagawas an Malakanyang hin Execuitve Order No. 105 nga nagpapahilawig ha 15% nga taripa ha gin angkat nga bugas kutob Disyembre 31, 2025, ngan maghimo hin Inter-Agency Group on Rice Tariff Adjustment agud bantayan ngan aydon an taripa ha bugas subay ha pagkiwa han presyo ha pankalibutan nga merkado.
Ha EO nga gin pirmahan ni Presidente Ferdinand Marcos Jr., magpapatuman hin bag-o nga mekanismo ha pag-ayad han taripa tikang ha Enero `1, 2026, depende ha pagbabag-o han presyo han bugas ha world market. An mga taripa in posible nga tikang ha 15% kutob 35%.
Subay ha kamanduhan han MFN (Most Favored Nation) rates of duty ha bugas, parehas in-quota ngan out-quota, ha ilarom han EO No. 62 in magpapabilin kutob ha Disyembre 31, 2025.
Tikang ha Enero 1, 2026, igtutudlok han gobyerno an paghitaas hin 5% han taripa ha kada lima ka-porsyento nga pag-ubos han presyo han bugas ha world market, ngan maubos hin 5% naman ha kada 5% nga paghitaas hin presyo.
Sugadman, ginsigurado han EO 105 nga dire maubos ha 15% o sobra ha 35% an magigin taripa han bugas.
An Inter-Agency Group on Rice Tariff Adjustment (IAG-RTA) in ginbubug-os han mga tinaglawas tikang ha Department of Economy, Planning and Development (DEPDev), Department of Agriculture (DA), Department of Trade and Industry (DTI), Department of Finance (DOF), ngan Office of the Special Assistant to the President for Investment and Economic Affairs (OSAPIEA).
Gin manduhan an grupo nga bumug-os hin mga aludayday ngan giya para ha pagpapatuman han EO, kaupod an pagtudlok han price thresholds, pagpapamatuod han DA kun umabot na ha igintalaan nga lebel an presyo, ngan regular nga monitoring han sitwasyon ha merkado.
