NATIONAL – Nanawagan an Palasyo han Malakanyang ha Senado nga pamatian an panawagan han business community nga dagmitan an impeachment trial ni VP Sara Duterte agud mapabilin an kadig-on han ekonomiya ngan kumpyansa han mga investors nga mamuhunan ha nasud.
Sumala kan Palace Press Officer USec. Claire Castro, mismo an mga ada h business sector na an naalarma ha pagdelay ha impeachment trial sanglit kinahangaln aksyunan na ine han Senado.
Ginmalatumat ni Castro nga dire kakaruyagon han mga investors nga mag-invest hin negosyo ha nasud kun an usa nga lider in gin aakusahan hin korapsyon ngan baga-baga hin kakampihan pa han pira nga mga senator-judges.
Gin panhimuwa gihapon ni Castro an nagin pahayag ni VP Sara nga laprak an ekonomiya han Pilipinas.
Gintagan-duon hine nga nag-uupay yana an dalagan han ekonomiya han nasud.
Dako nga bulig hine an pagkatanggal han Pilipinas ha grey list han Financial Action Task Force nga amu an nakaghatag hin hitaas nga investor confidence.
Igin parayaw naman ni Castro an report han Asian Development Bank (ADB) nga na-maintain han Pilipinas an maupay nga economic outlook han nasud para ha tuig-2025.
An pahayag ni Castro in baton ha nagin pahayag ni House Impeachment Spokesperson Atty. Antonio Audie Bucoy nga pwede maapektaran an investor confidence kun maiihaan an proseso ha impeachment ni Vice President Sara Duterte.
Samtang, gin rerespeto naman han Malakanyang an panawagan han business community nga padagmitan an impeachment trial ni VP Sara.
