TACLOBAN CITY – Tulo nga teachers ngan usa nga empleyado han gobyerno an naanod han makusog nga balud samtang nangangarigo ha Barangay Cabatuan munisipyo han Palapag Northern Samar alas 9 han aga dida han nakalabay nga Biyernes.
Ha ginbuhat nga search and rescue operation natad-an an patay nga lawas nira Artemio Mejos, 27 anyos, magturutdo ha Naparasan Elementary School ha bungto han Mapanas ngan hi James Dulay, 30 anyos an pangidaron, empleyado han LGU Laoang nga naglulutaw lutaw ha mabato nga parte han dagat sakop han Barangay Cabatuan.
Banda alas 11 kagab-i narekober liwat ha Sitio Libas, Brgy. Nipa Palapag Northern Samar an patay nga lawas ni Leonard Adarayan, 32 anyos an pangidaron, magturutdo ha Pamplona Elementary School Unit I ha Las Piñas City
Samtang, padayon pa nga ginbibiling han mga otoridad hi Reynalda Adora, 30 anyos, maestra ha Bliss Montessori San Andres, Manila.
Ha inisyal nga imbestigasyon han mga kapulisan, nagawas nga magklarasmeyts han college an mga biktima ngan nagplano an mga ini nga mag-outing.
Sumala kan Police Lt. Col. Rafael Tayaban, Chief han Police Community Relations Northern Samar Police Provincial Office, nagdesisyon an magsarangkay nga magpicnic ngan mag night swimming ha Cabatuan beach, usa nga popular nga tourist destination han lugar tungod han mahusay hini nga mga rock formations.
Samtang nangangarigo, naagi-an an grupo hin magkusog nga balud ngan naanod an mga ini.
Padayon naman an ginbubuhat nga search and rescue operation han Palapag MDRRMO para matad-an an usa pa nga missing.
Naglalaum liwat an pamilya hini nga talwas nga matatad-an ira paryente.
