TACLOBAN CITY – Temporaryo nga ginsaradhan an MacArthur Shrine National Park ha bungto han Palo, Leyte mahitungod han mga ginbubuhat nga mga paghingayad o kun mga renovation.
Subay ha impormasyon han Department of Tourism Region 8 nga an mao nga paghingayad in kumo pangandaman para han pagtigaman han anibersaryo han Leyte Gulf Landings yana nga tuig.
“Kun nakita kamo yana, sarado an atun MacArthur Park National Shrine. Kay ano ginsarahan? Kay in preparation for the 80th Leyte Gulf Landings Anniversary.” yakan ni DOT Eastern Visayas Regional Director Karina Rosa Tiopes durante han Kapihan sa Bagong Pilipinas.
Maoobserbaran gihapon nga gin aayad an Boyscout Monument ha Candahug, Palo, Leyte nga kaparte gihapon han ginbubuhat nga mga improvements han Provincial Government han Leyte.
“The Provincial Government of Leyte and actually there is another project with TIEZA, nagkakamayda kita hin mga enhancements ha park.” pasabot pa ni Tiopes.
Dugang pa niya nga basar ha iginpresentar han ira meeting in an nasabi nga boyscout monument in magigin full landscape na tapos magkakamayda hin obelisk nga kun diin, an mao nga monumento in aadto na ha igbaw.
An mga karsada naman nga tipakadto ha MacArthur Shrine in pagbubutangan hin mga flagpoles han mga allied forces durante han selebrasyon han anibersaryo.
“Pag abot mo ha park proper, kun naatubang ka ha right side of the park, maghihimo dida hin bagan pond, which will actually replicate the landings. So may pond, mga barge, so atleast pagkada hitun mga tawo, mafefeel talaga niya nga so this is what happened before. Talagang visually makikita niya kun ano an nahinabo before kay ha yana an aada man la kay an atun mga statues han mga key people who were part of the landings.”
Ginlalauman gihapon ni Tiopes nga pag aaydon an butnga han parke nga kun diin, an magdedesisyon naman daw in an National Historical Commission of the Philippines.
Natuo gihapon hiya nga sadang la nga mas paupayon an mao nga parke in labi na nga ini daw an pinaka ginbibisita nga lugar han mga turista ha kada napakanhi ha Sinirangan Bisayas.
Lauman daw an mas ginpahusay ngan mas ginpaupay nga park nga makikit-an han publiko in labi na an mismo mga istatwa ngan iba pa nga aadto han park.
