TACLOBAN CITY – Duha an naitala nga patay samtang usa naman an samaran mahuman nga mag-amok an usa nga suspek ha Sitio Hitoyan, Brgy. San Pascual, Dolores, Eastern Samar.
Ginkilala an suspek kan Mario Tomenio, ada ha igo nga pangidaron, usa nga parag-uma ngan residente han mao nga lugar.
Samtang ginkilala naman an mga biktima nga namatay nga hira Lemar Ambal, 24 anyos ngan hi Reynaldo Tegio, 49 anyos parehos mga residente gihapon hnan mao nga barangay.
Sumala kan Pol. Capt. Wilmer Basarte, Chief of Police han Dolores Municipal Police Station, nag-amok an mao nga suspek ngan ha dire masabtan nga rason in ginpaninigbas hini an mga biktima.
Gindeklara nga dead on the spot an duha nga biktima samtang an usa naman nga biktima nga hi Noreymark Tegio, 21 anyos, in dayon nga gindara ha ospital ngan ha pagkayana in padayon nga nagpapaupay.
Nagprobar gihapon nga magpakamatay an suspek pinaagi han pagbuno han iya kalugaringon pero nadara pa ini ha ospital ngan ginpailarom ha operasyon.
Ha pagkayana in padayon an ginbubuhat nga imbestigasyon han mga kapulisan bahin han motibo han mao nga suspek ha iya ginbuhat nga krimen.
