TACLOBAN CITY — Patay an usa nga lalaki mahuman ini nga tigbason han iya sangkay mayhitungod la nga napirde han ira mulay nga “Boo” ha Barangay Victoria, Sta Fe Leyte.
Ginkilala an biktima nga hi Mario Triveros, 38 anyos an pangidaron samtang an suspek naman in nakilala kan Bibiano Dader, pareho mga residente han Brgy Tibak han mao nga bungto.
Sumala kan SPO2 Ramon Vetargo, duty imbestigator han Sta Fe PNP, nga samtang nag iirignom an mga ini in nahunahunaan nira nga magmulay hin “Boo” kun diin pirmi pirde an suspek tungod han kahangit hini nga hiya in pirmi la pirdehan, ini in nagpasangil nga maihi ngan pagbalik in tigda nala nga gintigbas an biktima ha liog.
Nahibaruan naman nga magsuok nga magsangkay an suspek ngan han biktima nga magkausa pa ha trabaho.
Dayon naman nga nadakop an suspek ngan yana in naatubang na ha kaangayan nga kaso ngan nakapaslak na ha Sta Fe municipal police station.
